A cultura ábrese camiño na adversidade, argallando novos xeitos de facer promoción, irmandade, comunicación e fronte común arredor dos libros. Se algo nos demostrou a pandemia, foi a nosa importante capacidade para buscar no ámbito virtual xeitos de revivir e, tamén, de resistir. Desta premisa xorde o Festival Virtual do Libro de Galicia, cuxa primeira edición nace coa intención de que “o libro e a literatura do país non fiquen parados polas circunstancias que vive o mundo”.
O FLIV, malia xurdir “como resultado dun momento moi concreto”, ten a vocación de perdurar nos vindeiros anos. A primeira convocatoria celebrarase de maneira virtual entre os días 26 e 28 de xuño e mañá, 30 de maio, abrirá o seu portal web (www.fliv.gal) que será o punto de encontro deste novo festival literario.
O FLIV é un “punto de encontro virtual” segundo explica unha das súas organizadoras, a escritora Anna R. Figueredo, engadindo que se trata “dun tipo de festival no que se encontrará todo tipo de literatura “desde a BD ata a tradución”. Nace tamén para ser un enclave diverso, dando acubillo a todos os contidos e xéneros posíbeis, “atendendo tamén ás circunstancias propias do ano 2020”. Por esta razón, Ricardo Carvalho Calero e Concepción Arenal terán especial cabida no evento online.
Terá apartados para a literatura e as peregrinacións e fará un repaso por todos os xéneros literarios: novela, ensaio, poesía, teatro e literatura infantil e xuvenil, sen descontar o cómic ou a presenza doutras literaturas na literatura galega por medio da tradución.
No soportal do FLIV desenvolveranse distintas actividades relacionadas co libro: presentacións, debates, clubs de lectura e tamén encontros entre autores coa vantaxe, segundo explican os organizadores, de que “estes contidos permanecerán na web e seguirán sendo accesíbeis unha vez pasadas as datas do festival”.
A proposta, organizada pola escritora e xestora cultural Anna R. Figueiredo, o espazo web Fervenzas Literarias e a empresa Datalib, conta asemade co apoio da Secretaría Xeral de Política Lingüística da Consellería de Cultura e Turismo da Xunta de Galicia.
Nos vindeiros días anunciarase a programación completa para a súa celebración entre os días 26 e 28 de xuño de 2020, unha programación na que “estarán presentes as principais figuras literarias do país e na que tamén participarán os axentes arredor do libro, as bibliotecas e librerías e os colectivos que se moven en Galicia arredor da literatura”, explican dende a organización.
