Na tarde de hoxe un home foi evacuado a bordo da aeronave medicalizada con base en Santiago tras sufrir unha lesión despois de tirarse ao mar. Os feitos tiveron lugar ás 16:45 horas no concello coruñés da Pobra do Caramiñal. A esa hora, unha persoa particular chamou ao 112 Galicia para solicitar asistencia medica urxente para un compañeiro que sufrira unha caída ao tratar de lanzarse á auga na zona entre a Praia de Cabio e os areais, na cala de Niñeiriños. Segundo a información facilitada polo alertante aos xestores do 112, despois de caer ao mar, o home quedou inmóbil provocando a preocupación dos seus acompañantes que, ao darse conta do incidente, acudiron a rescatalo. Unha vez fose da auga, os seus compañeiros fixáronse en que non podía mover as pernas e trataron de pedir axuda a través dunha chamada ao Centro Integrado de Atención ás Emerxencias ( CIAE) 112 Galicia. Nada máis ter constancia dos feitos, desde o CIAE solicitouse a intervención dos servizos sanitarios que mobilizaron ata o punto ao helicóptero medicalizado. Para prestar apoio ao equipo médico de Urxencias Sanitarias de Galicia-061, desde o 112 pediuse a colaboración dos axentes da Policía Local e dos membros de Protección Civil da localidade.
