O número de desempregados na comarca supera os 4.000 no Barbanza e un 22 % máis que hai un ano. Os datos do desemprego non fixeron senón confirmar unha realidade que xa todos esperabamos. Que a crise sanitaria provocada polo coronavirus levouse por diante, en mes e medio, a boa evolución que o mercado de traballo rexistraba nos últimos meses,se non anos, nas nosas comarcas. E é que se terribles son os datos de incremento no número de parados durante o pasado mes de abril, con subidas de 1.296 desempregados (13,4%) na zona de Santiago, coa capital de Galicia á cabeza sumando 761 parados máis nun mes para un total de 6.571, ou do Barbanza, onde a peche de abril as persoas que buscaban emprego a través de oficinas públicas era de 4.062, 432 máis (11,9%) que o mes anterior, as cifras e as porcentaxes dispáranse se sumamos os datos de marzo e comparámolos co paro de hai un ano.
A suba interanual do paro chegou ó 13,2% no Barbanza e é que a paralización da economía desde a entrada en vigor do estado de alarma polo COVID-19 provoca que en varias comarcas da nosa contorna o paro estea a subir en porcentaxes que superan o 20 % con respecto a abril e 2019.
Así, a zona de Muros (24%) e a comarca de Ordes (23%) son as que rexistran unha maior subida da taxa interanual, seguidas da comarca de Santiago (21,8%), a de Arzúa (20%) e O Sar (17%). Cun incremento relativo algo inferior nos últimos 12 meses atópanse zonas como as de Xallas (16%) ou Noia (14%), xunto á comarca do Barbanza (13,2%) e Melide (11%).
