A Deputación da Coruña aprobou por unanimidade o Plan de Emprego Local (PEL) para o período comprendido entre 2020 e 2023, dotado inicialmente con 40 millóns de euros e cun obxectivo ben definido: impulsar o emprego nos concellos e contribuír, a curto e medio prazo, a paliar as dificultades do tecido empresarial ocasionada pola COVID-19. A entidade provincial anunciou que fortalecerá o plan neste mandato, “debido á boa acollida do mesmo entre empresas e emprendedores nos seus primeiros catro anos”. Agora, a Deputación quixo salientar o potencial do programa para combater as consecuencias da crise sanitaria.
Nun plano máis específico, amais da creación de emprego, o PEL 2020-2023 diríxese a iniciar e consolidar novas empresas na provincia, fomentar o emprendemento e a innovación, valorizar os recursos locais e favorecer a fixación de novas iniciativas de mercado e profesionais en zonas rurais. Tamén se busca modernizar e dixitalizar o tecido empresarial “a través dunha serie de servizos e axudas complementarias ás que proporcionan as diferentes administracións”.
Segundo explicou, facendo balance, o presidente provincial, Valentín González, a posta en marcha do PEL 2016-2019 supuxo “un investimento provincial sen precedentes en materia de emprego”, conseguindo que 2.636 persoas atoparan un posto de traballo na provincia grazas as liñas de PEL-Concellos e PEL-PEMES e 829 emprendedores e emprendedoras recibiran o apoio económico da Deputación para investimentos e actividades relacionadas coa súa actividade empresarial. Amais, foi posíbel captar máis de 6 millóns de euros de financiamento europeo con vistas á execución de proxectos de empregabilidade e puxéronse en marcha os primeiros centros da Rede Provincial de Espazos de Coworking, composto de cinco puntos de traballo innovador e colaborativo: o centro de Oleiros destinado ao sector da arquitectura, o urbanismo, a enxeñería ou as enerxías renovábeis; o de Carballo a empresas TIC; o de Boiro ao sector do mar, o de Brión á transformación de produtos do sector primario, e o de Ames no sector audiovisual e a innovación dixital.
