O certame Rianxo Streaming Festival, o festival de audiovisuais online lanzado polo Concello para combater a monotonía dos días de confinamento e estimular a creatividade das confinadas e confinados, segue adiante con novas contribucións e sacando a relucir a vertente máis solidaria da arte de cada quen. Este mércores 8 de abril a iniciativa xa contaba cunha trintena de vídeos, entre as que destacaban as recentes contribucións de Merche Pimentel (o conto Rata linda de Compostela, que xa ten 174 reproducións), a homenaxe aos anos oitenta de Carlos Ces (Recreativas dos oitenta, con máis de 300 reproducións) ou a revisitación de Fuerteventura de Russian Red que achegou Iria Ramos (con preto de 300 reproducións).
Entre as pezas máis vistas tamén salientan o cantar Collín toxos e flores interpretado de maneira simultánea (e dende distintos emprazamentos de confinamento) por integrantes da Asociación Fogo Fatuo, a rumba Montealegre que interpreta, tocando unha manchea de instrumentos, José Caamaño Romero, a Muiñeira do coronavirus e, tamén, a Rianxeira interpretada pola veciñanza de Rianxiño.
