Esta ponte do primeiro de maio intensificaranse os controis nas estradas dos nosos concellos

A Subdelegación do Goberno quere lembrarnos nesta ponte do primeiro de maio que o Decreto de Alarma, malia terse suavizado con algunhas medidas, segue cen por cen vixente no que se refire á prohibición de circular polas estradas sen causa xustificada. Con vistas a evitar desprazamentos de tipo vacacional e de lecer (por exemplo as viaxes ás segundas vivendas), a Subdelegación anunciou que as Forzas e Corpos de Seguridade intensificarán os controis este fin de semana.

A subdelegada, Pilar López-Rioboo, apelou “á conciencia social” para remarcar a necesidade de respectar o Estado de Alarma e non relaxar as normas de comportamento establecidas para conter o virus COVID-19. Por iso, lembrou que tanto “a Garda Civil como a Policía Nacional como os axentes das policías locais reforzarán os seus dispositivos durante este fin de semana, coincidindo coa festividade do 1 de maio e para tratar de impedir desprazamentos inadecuados a segundas residencias”.

Para evitar “actitudes irresponsábeis e anómalas”, a subdelegada fixo un chamamento aos veciños e veciñas dos concellos coruñeses para “que manteñan o seu alto grao de cumprimento das normas e sobre todo a non relaxarse no seu comportamento”.