O Goberno galego confirmou este venres 17 que xa entregou aos concellos de Barbanza o Fondo de Cooperación Local do mes de marzo e maila liquidación de 2018 para dotalos de efectivo. Esta medida, unha iniciativa para “axudar aos gobernos locais no medio da pandemia, agora que máis o necesitan”, veu da man da Consellería de Presidencia, que subministrou no primeiro trimestre de ano, en termos máis concretos, máis de 1,6 millóns de euros aos concellos da nosa comarca para “poder facer fronte a crise do coronavirus”.
O delegado territorial da Xunta, Ovidio Rodeiro, apuntou que “ademais de liquidar o mes de marzo en tempo e forma, decidiuse realizar o pago da liquidación pendente de 2018, para que os alcaldes conten neste momento con partidas económicas para todo aquilo que consideren máis necesario e urxente”. E engadiu: “Desde a Xunta de Galicia entendemos que é o momento de arrimar o ombreiro e de facer un esforzo económico en todos os campos para poder axudar a facer fronte á pandemia”.