Hai moitas de celebrar o Día do Libro (este 23 de abril) pero nestes tempos de confinamento e crise sanitaria só podemos facelo dun único xeito: ficando na casa e lendo. Porén, tamén podemos seguir en contacto coas bibliotecas da nosa vila, que, malia ter as portas pechadas e non poder (como viña sendo costume dende hai anos e como estamos seguros que lles gustaría seguir facendo este 2020) facer agasallos e recomendacións ás súas usuarias e usuarios, seguen coas portas e as xanelas virtuais ben abertas. Hoxe a Biblioteca Municipal de Ribeira celebra a xornada deste 23 de abril nas redes sociais con varias propostas interesantes. Por exemplo lembrándonos a importancia de ficar nos nosos fogares e dicir ben alto: #euquedonacasa. E, se ademais, facémolo na compaña dunha boa lectura (“que nos dea solucións a cada problema, a cada dúbida, e con eles cociñamos, viaxamos, amamos…”), mellor que mellor.
Outra das súas propostas é abrir a felicitación virtual que lle adica dende o seu Facebook a todas as nenas e nenos da casa, de boca da mesmísima protagonista de A toupiña que quería saber quen lle fixera aquilo na cabeza.
A Biblioteca de Ribeira tamén nos lembra que malia que “os andeis da sala están hoxe confinados”, podemos acceder a máis títulos dos que temos á man na casa utilizando, por exemplo, a plataforma de préstamo en liña da Rede de Bibliotecas de Galicia á que pertence a de Ribeira https://www.galiciale.gal/.
Amais, a Biblioteca ribeirense aproveitou o día para mostrar o seu fondo agradecemento ás libreiras e libreiros quen “co seu saber e bo facer recomendan, indican, axudan a que a selección do libro que compramos sexa a máis adecuada”. Elas e eles seguen adiante, coas portas pechadas pero permitíndonos, malia todo, “aumentar os títulos nos nosos andeis ou facer preciosos agasallos no Día do Libro”.
