A Asociación de Empresarios de Ribeira prosegue coa súa actividade de traballo e defensa do sector ante o inimigo común da pandemia e a crise sanitaria, poñendo o foco, desta volta, en pechar fileiras arredor dun dos ámbitos produtivos que máis está a sufrir co actual Decreto de Alarma: a hostalaría. Dende a asociación ribeirense mostran a súa total adhesión ás protestas deste sector no concello, protestas que reflectimos este xoves polo miúdo en O Babanza, “xa que lle asiste a razón”, indica a asocicación, “ao non considerar válidas e viábeis as medidas de desescalada do Goberno central para a reapertura dos establecementos”.
Segundo explica a entidade, “ao igual que ás hostaleiras e hostaleiros, as medidas do Executivo estatal parécennos medidas que imposibilitan a reapertura, pois só provocarían a ruína e o peche definitivo dos negocios”.
En opinión da asociación, precísanse disposicións que ademais de preservar a saúde dos clientes e empregados, poidan dar resposta á viabilidade económica dos establecementos afectados, “aos que lles manifestados o noso máis decidido apoio para conseguir unhas condicións lóxicas para que poidan abrir os seus negocios coa mirada posta, polo menos, en ser quen de obter o soldo básico preciso que lles permita manter ás súas familias”.
