A Comisión de Seguimento de Evolución do COVID-19 do Concello de Ribeira acordou hoxe unha serie de novas iniciativas para mitigar entre a poboación as consecuencias económicas da pandemia e do parón empresarial e social. Seguindo esta vontade mitigar os efectos do Estado de Alarma, o pago das taxas de auga, lixo e sumidoiros amplíase até o 15 de maio (inicialmente previsto para o período que vai do 15 de febreiro ao 15 de abril), e o de imposto de vehículos (programado para o período comprendido entre o 15 de marzo e o 15 de maio) até o 15 de xuño.
Media hasta
Outro dos asuntos acordados durante a Comisión deste martes 31 de marzo foi a colocación a media hasta das bandeiras da Casa Consistorial como “homenaxe e respecto a todas as persoas vítimas da crise sanitaria provocada polo COVID-19”.
A maiores, o Concello deu a coñecer que continúa co reparto de material preventivo, desta vez entre a Policía Nacional, a empresa de xestión de lixo Urbaser, Correos e a Lonxa.
No capítulo de agradecementos, amosouse a gratitude do Goberno local á campaña impulsada entre a hostalería e o comercio para dotar de recursos alimentarios a Cáritas Parroquial, unha iniciativa na que colaborará o Concello dando instrucións a Protección Civil para que sexa o seu voluntariado o que acuda á recollida de alimentos polos establecementos co obxectivo de “evitar a vulneración das normas de confinamento e afianzar as medidas de seguridade establecidas polo Estado”.
Tamén se agradeceu o labor altruísta de Grúas Kiko pola doazón de 600 pares de guantes e do Liceo Marítimo de Ribeira pola posta a disposición das súas instalacións.
Uso do galego
Por outra banda, en sintonía cunha suxestión do BNG local, aprobouse unha disposición para que nas homenaxes pola Policía Local ás persoas que están de aniversario (menores de idade e maiores de 75 anos, previa chamada ao 981 870 933) se pregunte aos solicitantes pola súa preferencia en canto ao idioma (galego ou castelán) e, de resultarlles indiferente, se lle dea prioridade o uso do galego con Parabéns para ti.
A Policía Local tamén informou de tres denuncias nas últimas 24 horas por infrinxir a obriga de confinamento.
