Ante o Estado de Alarma, nada mellor que deixar voar o talento, a creatividade e a imaxinación. Estas son as premisas do certame Rianxo Streaming Festival, o festival de audiovisuais online lanzado polo Concello, que destaca tamén polo seu importante compoñente de confraternidade e solidariedade fronte a un problema común. O certame, que tira proveito da experiencia participativa e audiovisual da xente rianxeira (cómpre lembrar que Rianxo é un dos concellos adheridos a Youtubeiras, a iniciativa-concurso para encher YouTube de vídeos en galego), xa foi obxecto de 20 contribucións, logo de preto dunha semana de actividade.
Entre os vídeos máis reproducidos atópase o cantar Collín toxos e flores interpretado de maneira simultánea (e dende distintos emprazamentos de confinamento) por integrantes da Asociación Fogo Fatuo, a rumba Montealegre que interpreta, tocando unha manchea de instrumentos, José Caamaño Romero, a Muiñeira do coronavirus e, tamén, a Rianxeira interpretada pola veciñanza de Rianxiño.
O certame
O Concello de Rianxo quixo pór o seu gran de area para facer que o confinamento da veciñanza fose estes días o máis levadeiro posíbel. Por esta razón, puxo en marcha esta semana un certame de creación de “contidos dixitais contra aburrimento na corentena”, o Rianxo Streaming Festival. O obxectivo é converter en fervedoiro de talento e participación a reclusión forzosa da xente nos seus fogares derivada do estado de alarma para frear o espallamento do andazo de COVID-19.
Co
gallo do festival poderase presentar todo tipo de contribucións
dixitais: música, contos, monólogos, divulgación, etc. Este
material será publicado na canle de YouTube ou compartidos nas
propias redes sociais co cancelo #RXtreaming. “O noso obxectivo non
é outro que combater o aburrimento e fomentar a creatividade, ao
tempo que reforzar o sentimento de pertenza a unha comunidade veciñal
tan activa como a rianxeira”, explican dende o Concello, debullando
os pasos para participar no certame.
