O Bloque Nacionalista Galego de Pobra do Caramiñal, co gallo das celebracións deste 8-M, Día Internacional da Muller Traballadora, emitiu un comunicado dirixido a reclamar, arredor de cuestións tan relevantes como as que se piden cada ano con motivo da dita xornada (visualizar o sometemento e a discriminación, reivindicar a igualdade de dereitos), a máxima presenza institucional arredor dos diferentes actos reivindicativos. No comunicado a agrupación local critica, nun plano máis concreto, o desenvolvemento das actividades impulsadas polo Goberno municipal de Nós Pobra e PSOE.
“Dende o BNG”, explica o grupo que coordina Laura Novelle, “consideramos que esta data non só debe ser participativa a nivel individual, senón que é fundamental que as institucións fagan seus os principios de igualdade de xénero, que se enchan de feminismo e por suposto de sororidade”. Máis polo miúdo, a agrupación móstrase crítica co desenvolvemento do programa de mobilización local, onde, segundo explica o BNG, “non se fixo un manifesto único de consenso para a súa lectura”, senón que foi elaborado polo Goberno pobrense e logo presentado ante as outras agrupacións para acadar a máxima participación nas actividades do 8 de marzo.
“Para institucionalizar esta data”, engade o BNG, “cómpre consensuar unha mensaxe única, na que participemos todas e todos; non é cuestión de apoiar algo feito, senón de compartir, de crear, de facer que o traballo colectivo sume”. O grupo tamén esixe que en vindeiras convocatorias se amplíe o período de tempo para acadar un manifesto colectivo: unha marxe suficiente para “xuntármonos, consensuar e, por suposto, convocar”, conclúe.
