A suspensión das nosas actividades cotiás por mor do estado de alarma chega a todos os ámbitos, mesmo ao da adopción de animais. A protectora Moura, con centro de operacións en Barbanza (na Pobra, concretamente), comunicou nas redes sociais que está a compaxinar a continuidade do seu importante labor coa redución ao mínimo da actividade presencial coa veciñanza. Deste xeito, malia que proseguen as comunicacións e o traballo de coidado e atención relativo aos animais, cancelouse até novo aviso o servizo de adopcións. Deste xeito, fican adiados todos os procesos de entrega que estaban programados ao longo destes días.
As novas circunstancias de crise sanitaria e a imposibilidade de culminar procesos de adopción obrigou á protectora a deixar de acoller máis animais “até que os pequenos que temos reservados poidan ir ao seu fogar definitivo e así evitar a saturación da protectora, agás casos de extrema urxencia”.
Porén, a entidade segue adiante atendendo correos e mensaxes por Whatsapp, aínda que sexa “preciso agardar a que a situación se normalice para seguir entregando os nosos animais” aos fogares que os acollerán.
Moura, para despexar dúbidas e evitar alarmas innecesarias, tamén lembra que os animais non transmiten o COVID-19.
