O persoal do Centro de Saúde de Rianxo e as/os integrantes do Grupo de Protección Civil local habilitaron este martes 24 de marzo a tenda para triaxe no exterior das instalacións do Centro de Saúde. A posta a punto deste novo espazo de atención, directamente encamiñado a facilitar o traballo do persoal médico no actual estado de alarma derivado da pandemia de COVID-19, levouse a cabo en colaboración coa brigada de obras do Concello de Rianxo e a Policía Local.
Segundo explicaron os participantes nas tarefas, o espazo de triaxe habilítase para evitar contaminar o Centro de Saúde en casos de síntomas de coronavirus, de maneira que é posíbel “organizar e catalogar os pacientes no exterior e non tomar riscos innecesarios”. Este tipo de instalacións temporais úsase moito en catástrofes e casos de pandemias como a do COVID-19.