A Concellería de Cultura da Pobra que dirixe Patricia Lojo ten programada para este mes de febreiro unha completa axenda de espectáculos e actividades que, en maior ou menor medida, xirarán arredor do Entroido e de todos os principais ingredientes desta festividade: o humor, a diversión, a creatividade e a participación. Estes son tamén os ingredientes do espectáculo previsto para este domingo 9 de febreiro: a representación da comedia Running a cargo da compañía D Ste Xeito, ás 19.00 horas.
A obra, dirixida e escrita por Esther F. Carrodeguas e protagonizada por Stephy Llaryora e Sergio Macías, ten como fío temático a práctica deportiva, pero non unha práctica deportiva calquera, senón o complexo desafío artístico-ximnástico de interpretar, suando a camiseta, até unha vintena de personaxes. Os encargados deste importante reto serán Xulia e Román (interpretados por Stephy e Sergio) que acaban de coñecerse e de ter a súa primeira cita, convocando nela todo tipo de recordos e persoeiros en maior ou medida presentes: fillas e fillos de parellas anteriores, nais divorciadas, avós na residencia, adolescentes co pavo, etc. Con todo, ao longo do seu encontro irán descubrindo que a tarefa máis complexa de resolver é unha tarefa coa que non contaban: como facer que as súas axendas cadren? Como descubrir se a chama do amor finalmente acendeu entre tanto ensarillado de de familias, vidas, e medos que cada un carrexa consigo?
