A semana que vén, a actividade de Xornalismo na Escola La Caixa (o programa didáctico sobre os medios de comunicación impulsado polo Colexio Profesional de Xornalistas de Galicia e a Obra Social La Caixa) trasladarase a Ribeira, concretamente o luns 2 de marzo no IES Nº1 da localidade barbanzá. Haberá tres obradoiros, con comezo ás 9.50, ás 12.00 e ás 16.00 horas. Imparte as actividades a xornalista e experta en xestión cultural, Olaia Tubío Rei. O programa tamén chegará na mesma semana á Coruña (luns 2), Miño (martes 3 e Xoves 5) e Teo (xoves 5).
Estes obradoiros forman parte dun total de 90 que pretenden chegar a miles de rapaces e rapazas de toda a Comunidade. Durante os meses de febreiro, marzo, abril e maio, as e os xornalistas do Colexio mostrarán ante a xuventude galega coñeza o funcionamento dos medios de comunicación e fomentarán o seu espírito crítico ante os contidos que se difunden nos distintos soportes offline e online. Nun plano máis concreto, os alumnos tratarán temas como os riscos e vantaxes das novas tecnoloxías de información e a comunicación (TIC), a necesidade da mediación e o contraste de fontes no xornalismo ou, tamén, como lle afecta á xente nova a veracidade e o rigor xornalístico.
Este proxecto, que se pode seguir en Twitter baixo o cancelo #XornalismoNaEscolalaCaixa, naceu grazas a un acordo acadado a finais de 2015 entre o Colexio Profesional de Xornalistas de Galicia e a Obra Social La Caixa. As catro primeiras edicións desenvolveron con grande éxito entre o 2016 e o 2019 máis de 360 obradoiros de comunicación en numerosos puntos da xeografía galega, levando estas actividades a miles de alumnos e alumnas da Comunidade.
