Un total de 92 centros de ensino da provincia da Coruña participan este curso 2019/2020 nas iniciativas de Voluntariado de Lectura impulsadas pola Consellería de Educación. Trátase de dúas accións: Voluntariado na biblioteca escolar (Secundaria) e Voluntariado de lectura-A (Primaria). Pola nosa comarca, no primeira das actividades concorren o IES da Cachada de Boiro, o IES Félix Muriel e máis o CEIP Eusebio Lorenzo Baleirón, de Dodro. Na segunda das accións, o Voluntariado de lectura-A, participarán o CEP Xosé María Brea Segade (Rianxo), o CEIP de Olveira (Ribeira) e o CEIP O Grupo de Ribeira.
O obxectivo destas iniciativas, que se enmarcan no programa Bibliotecas Escolares Solidarias, é “estimular o voluntariado cultural en relación coas bibliotecas e a lectura entre o alumnado e recoñecer os esforzos das comunidades educativas por conformar bibliotecas escolares inclusivas”.
Respecto do obradoiro Voluntariado na biblioteca escolar, abéiranse a el 121 centros de toda Galicia e está dirixido a centros de ESO, Bacharelato, FP ou ensinanzas de réxime especial que contan con grupos formalizados de alumnado colaborador. Voluntariado na biblioteca escolar encamíñase, en palabras da Consellería, a “favorecer actitudes de colaboración e de solidariedade entre o alumnado galego, especialmente no ámbito cultural, o que poderá materializarse en actividades de colaboración na biblioteca escolar, de lectura compartida ou de traballo coa información, organizadas pola biblioteca, dentro ou fóra do centro”.
No caso da acción Voluntariado de lectura-A, é unha iniciativa dirixida a centros que matriculan alumnado de 5º e 6º cursos de ensino primario. Participan este curso un total de 41 centros da provincia (106 en toda Galicia). Búscase, coma no anterior caso, mobilizar ao alumnado en relación á lectura.
