Esta tarde tivo lugar a apertura da oitava edición da Feira de Inverno do pequeno comercio, impulsada pola Asociación de Empresarios de Ribeira en colaboración co Concello. A este acto asistiron, entre outros, o alcalde Manuel Ruiz, membros da corporación municipal e representantes da patronal ribeirense, acompañados do conselleiro de Economía, Emprego e Industria, Francisco Conde.
Durante o seu percorrido pola mostra, o conselleiro destacou o dinamismo, variedade e calidade do sector comercial do municipio, apuntando que o comercio de proximidade é un dos principais motores económicos das vilas e cidades galegas, e un dos seus maiores atractivos.
Situado na carpa do Malecón, este evento desenvólvese do 28 de febreiro ao 1 de marzo, contando coa participación de 15 establecementos, cifra que se viu incrementada respecto á anterior convocatoria, que poñen á venda o seu stock con descontos. Así mesmo, cada día efectuarase un sorteo presencial de 50 euros en vales de compra para consumir nos locais que toman parte desta feira. O horario establecido é o venres 28, de 11.00 a 22.00 horas; o sábado 29, de 10.00 a 22.00 horas; e o domingo 1, de 11.00 a 20.30 horas.