Unha muller estivo a piques de morrer afogada na Pobra tras precipitarse ao mar. O suceso produciuse ao redor das 13.30 horas na zona marítima fronte á Oficina Municipal de Turismo, tamén coñecida como Casa Mariñeira. Cando a Policía Local chegou ao lugar para socorrela, uns mariñeiros xa conseguiran sacala da auga e introducila na embarcación. A muller respiraba con dificultade e expulsaba auga, procedéndose a colocala en posición lateral de seguridade para o seu posterior traslado ao Hospital da Barbanza.