A sección sexta da Audiencia Provincial da Coruña, con sede en Santiago, acordou a prórroga da situación de prisión provisional do condenado polo crime de Diana Quer.
A Audiencia decreta que a máxima duración posible da prisión provisional concluirá o 29 de decembro de 2032. No auto, o maxistrado presidente explica que “debe precisarse que tal é o tempo máximo que a norma permite, o que non implica -nin é en absoluto previsible- que a medida poida ter necesariamente tal duración, nin exclúe que o tempo transcorrido de privación provisional de liberdade constitúa un factor que deba ser tido en conta para o mantemento ou cesamento da medida, como esixe a súa natureza provisional e excepcional.” O xuíz destaca que “non se discutiu a subsistencia de motivos xustificadores da situación de prisión preventiva.”
Por outra banda, coñeceuse que a defensa de José Enrique Abuín recorreu a sentenza que o condenou o pasado mes de decembro a prisión permanente revisable polo acontecido en agosto de 2016.
Fíxose a través dun recurso de casación presentado ante o Tribunal Supremo e que reclama que se declare a nulidade da vista oral, que se devolva a causa á Audiencia Provincial da Coruña e que se celebre un novo xuízo.
