A agrupación Rianxo en Común que lidera Julián Bustelo vén de propoñer ante o Concello unha serie de accións a desenvolver no concello con cargo ao POS + 2020 (Plan Único de Concellos) da Deputación da Coruña, cuxo prazo de presentación de solicitudes remata o 19 de decembro. Entre as propostas de actuación figuran os traballos para mellorar a estrada que une os núcleos de Outeiro, na parroquia de Araño, cos de Cerqueiras, Vilar, A Varela e Campelo, na mesma parroquia.
Segundo Rianxo en Común, esta estrada presenta dende hai anos importantes carencias no seu firme, “o que pon en serio risco a seguridade das veciñas e veciños que a diario teñen que facer uso dela”. O colectivo engade que a vía, de 11 quilómetros de lonxitude, ten treitos especialmente deteriorados, nos que, “por falta de mantemento e pola acción das raíces das árbores que medran a carón da pista, as fochancas dificultan seriamente a circulación dos vehículos”.
A isto, explica a agrupación, cómpre engadir os agravantes de ser unha estrada de moitas curvas, moi afectada pola néboa e “na que apenas hai puntos de luz nos núcleos antes sinalados”. Rianxo en Común fai saber que a actuación “poderíase acometer con cargo aos fondos do plan provincial nun período de tempo razoábel, que contemplaría a adecuación do firme así como as melloras no trazado orientadas a aumentar a seguridade”.
Por outra banda, o grupo quere facer fincapé na necesidade de apostar en firme pola accesibilidade en “diferentes puntos do concello”, particularmente “na zona máis urbana do mesmo”, onde a concentracións de habitantes e servizos é maior. Neste senso, os integrantes de Rianxo en Común critican que “só na propia vila existen máis de 100 puntos nos que se incumpre a normativa vixente en materia de accesibilidade”. sinalan. A agrupación cita casos concretos de existencia de barreiras e atrancos, entre os que se atopan accesos a pasos de peóns con inclinación excesiva ou beirarrúas con elementos intrusivos.
En base a isto, a agrupación solicita que “se destinen os fondos aportados Plan Único de Concellos” para emendar a problemática da accesibilidade local, unha liña de traballo que, sinalan, xa contaría cun estudio pormenorizado de atrancos e barreiras identificados e localizados feito pola plataforma Rianxo en Común e que se poría a disposición do Concello e a Deputación.
