A Área Sanitaria de Santiago e Barbanza vén de facer balance das cifras de vacinación conseguidas os meses pasados na contorna xeográfica que lle é competente. Segundo fixo saber, rexistráronse unhas 101.000 vacinas no marco da campaña contra a gripe que se iniciou o pasado 14 de outubro e que rematou o venres 27 de decembro. Isto supón 3 puntos máis de cobertura que o ano pasado (8.300 persoas máis), engadiuse.
Das persoas vacinadas, unhas 65.700 pertencen ao grupo obxectivo de 65 ou máis anos, o que significa unha taxa de cobertura do 61% neste tramo de idade. O colectivo de 75 ou máis anos acadou unha taxa de máis do 67%.
A conto destes datos e outros referentes a outras áreas sanitarias da nosa xeografía, Sanidade quixo lembrar que as persoas que queiran vacinarse aínda están a tempo de facelo, malia que a campaña xa estea rematada. Poden levalo a cabo nalgún dos preto de 80 puntos de vacinación repartidos por toda a área sanitaria. Estarán dispoñíbeis durante o mes de xaneiro.
Quen queira máis datos sobre a doenza, pode consultar a web da campaña, https://gripe.sergas.es, que abrangue datos actualizados de interese para a sociedade e para os profesionais.
