A Consellería do Mar fixo arrancar hoxe (e nunca mellor dito) a campaña Vai de peixe, que consiste nun tráiler informativo que percorrerá diferentes localidades da nosa terra para promover o consumo dos produtos e do mar e a acuicultura entre os integrantes da chamada xeración millenial. Ou sexa, e para entendérmonos, o que a día de hoxe se coñece como xente nova. O tráiler comezou onte a súa andaina no Campus Sur de Santiago e seguirá os días vindeiros poñendo o foco nos lugares onde máis estudantes se concentren. O vehículo da campaña ofrece información sobre a mesma e demostracións de cociña nos que se mostran diferentes formas de preparar o peixe e o marisco.
Durante os vindeiros días, logo do seu paso polo Campus Sur de Santiago e a recalada no Campus de Pontevedra (este martes 19), o tráiler fará paradas no Campus de Vigo (este 20 de novembro), no paseo central do parque da Alameda de Santiago (21/11), na Escola Oficial Náutico-Pesqueira de Ribeira (o día 22, acompañándose da presentación oficial da campaña Vai de peixe), na Facultade de Ciencias do Deporte e a Educación Física da Universidade da Coruña (coa participación da atleta ribeirense Ana Peleteiro, o día 25), no Campus de Elviña da UDC (o día 26), no Campus de Ferrol (o día 27), no Campus de Lugo (o día 28) e no Campus de Ourense (o día 29).
Presentación da campaña
A Escola Oficial Náutico-Pesqueira de Ribeira acollerá este venres 22 de novembro ás 13:00 horas a presentación da campaña Vai de peixe. O acto tamén contará coa participación da atleta ribeirense Ana Peleteiro.
Que é Vai de peixe?
En palabras da Consellería do Mar é unha campaña pioneira en España destinada especificamente a impulsar o consumo dos produtos do mar e da acuicultura na franxa de idade entre os 18 e os 35 anos (a chamada xeración millennial). A iniciativa é unha estratexia baseada na promoción con formato de mobilidade (as citas nos principais emprazamentos estudantís da nosa terra) combinada cunha marcada vertente dixital a través da web https://vaidepeixe.xunta.gal/ e redes sociais (Instagram e canle de Youtube). Vai de peixe busca fomentar hábitos de alimentación saudábel e promover un consumo frecuente de peixe e marisco nesta franxa de idade, “para concienciar da importancia dunha nutrición equilibrada”. Durante o curso académico 2019 – 2020, a iniciativa abranguerá unha serie de accións destinadas á difusión de información dos produtos pesqueiros, así como de receitas sinxelas e adaptadas ao estilo de vida millennial.
