Entre o 15 de novembro e o 4 de xaneiro, o Centro Cultural Lustres Rivas vai acoller unha mostra do artista ferrolán afincando en Aguiño Paco Casal: a mostra Momentos, constituída por preto de 30 obras de técnicas e formatos variados (acrílicos, gravados sobre linóleo, gravados en 3D sobre papel artesanal, gravados ao ácido ou en talla PVC, etc).
Segundo avanza o Concello de Ribeira sobre a importancia das obras que constitúen a exposición, moitas delas foron seleccionadas ou galardoadas en certames de prestixio, como por exemplo a Bienal José Luis Fernández, Certame Internacional de Gravado Fundación Pedro Vivanco da Rioxa ou no Premio Atlante de Gravado do Museo de Artes-Riveira.
Nado en Ferrol en 1956, Paco Casal comezou a a súa andaina pictórica en 1985. Casal expón regularmente dende o ano 1990 e a súa obra ten sido recoñecida nunha manchea de eventos artísticos de pintura e gravado, con premios concretos ou coa elección das súas obras entre as escolmas finalistas, amais de engrosar un importante e senlleiro número de coleccións, tanto de particulares como de empresas e institucións públicas.
Momentos é a terceira mostra de Casal no Centro Cultural Lustres Rivas. A primeira foi en febreiro de 2015 (Realidades máxicas) e en xullo de 2016 participou nunha exposición conxunta co escultor rianxeiro Nuco Losada baixo o título A Galicia máxica. O Concello lembra que a inauguración da nova exposición de Casal será de entrada libre o día 15 ás 21 horas. O horario de apertura será de luns a venres de 10 a 14 e de 19 a 21 horas e os sábados de 11 a 14 e de 19 a 21 horas.
Será a décima mostra organizada este ano pola área de Cultura no Lustres Rivas que recibiu no 2019 ata o día de hoxe 3.165 visitas.
