20191010. A corporación municipal do Concello de Ribeira expresa “a súa máis enérxica condena” ante os sucesos acaecidos esta semana na localidade, “presuntamente vinculados con posibles casos de violencia machista.”
Segundo manifestan, “aínda que feitos desta gravidade non son habituais no noso municipio, non podemos deixar de concederlles a importancia que merecen nin permanecer impasibles como representantes que somos da sociedade ribeirense.”
Desde o Concello fan un chamamento ás forzas e corpos de seguridade para que “actúen coa máxima dilixencia e traten de esclarecer os sucesos coa máxima celeridade e, de ser o caso, poñelos a disposición da xustiza co fin de que se adoiten as medidas precisas contra os autores destes presuntos actos e tomen as precaucións oportunas para salvagardar as vítimas e as súas familias.” Así mesmo, agradecen o apoio da sociedade ribeirense á hora de colaborar coas vítimas, así como de denunciar os sucesos ocorridos ante as autoridades pertinentes. De igual xeito, solicitan que todas aquelas persoas testemuñas de situacións similares actúen decontado para evitar chegar a situacións de extremo perigo.
O Concello de Ribeira precisa que se pon a disposición das vítimas e das familias, “mostrándolles todo o seu apoio e medios dispoñibles.”
Neste senso, lembran a existencia dun Centro de Información á Muller (CIM) formado por profesionais na materia, ofrecendo recursos xurídicos e psicolóxicos ás usuarias que o necesiten.
