20101014 Dentro duns días, o 24 de outubro, vaise celebrar o Día da Biblioteca, un dos acontecementos anuais máis importantes do ámbito cultural, sobre todo polo que ten de reivindicación próxima do coñecemento, da lectura, da diversidade e do acceso (vía os libros) a outras linguas, países e puntos de vista.
O Día da Biblioteca, que se celebra dende hai máis de dúas décadas (dende que a Asociación Amigos do Libro Infantil e Xuvenil decidiu propoñer esta xornada para destacar as vantaxes de termos acceso local aos libros e á cultura), vai ter repercusión no Barbanza dende múltiples frontes, unha vez que os diferentes programas de actividades collan corpo na manchea de bibliotecas dos nosos centros educativos e, por suposto, nos espazos de préstamo municipais dos concellos e máis nas axencias de lectura (a Biblioteca de Rianxo, a Biblioteca de Boiro, a Axencia de Lectura de Escarabote, a Biblioteca da Pobra do Caramiñal e a Biblioteca de Ribeira).
O Día da Biblioteca está especialmente adicado ao público infantil e xuvenil. A proposta desta celebración veu da man da dita asociación, en recordo da destrución na Biblioteca de Saraxevo en 1992, e foi apoiada no seu día polo Ministerio de Cultura. Esta conmemoración naceu para “trasladar á opinión pública a importancia da biblioteca como lugar de encontro dos lectores de todas as idades coa cultura, e como un instrumento de mellora da formación e a convivencia humana”. A xornada celébrase a nivel galego e estatal e acompáñase dun pregón que se difunde en todas as bibliotecas de España.