20191007 Os vindeiros 18 e 19 de outubro toca baixar á praia contra vento e marea. O motivo? A celebración da oitava edición da Limpeza Simultánea de Praias da asociación ecoloxista ADEGA, unha quedada ambiental múltiple e colectiva que ten o obxectivo de ir alén dunha recollida de refugallos: búscase sensibilizar sobre a necesidade de coidar os mares e os ecosistemas marítimos galegos e do mundo, entre outras cousas porque o lixo mariño é un problema que non se está a solucionar co traballo das administracións implicadas: necesítase a acción de cada quen e unha liña de traballo divulgativa que debe comezar nos fogares e nos colexios.
Segundo lembra ADEGA, a nivel mundial, cada ano 10 millóns de toneladas de lixo acaban no mar.
A comarca do Barbanza, cuxa participación está aínda por concretar (que entidades participan, que praias se inclúen nos labores nesta edición), é unha das máis contornas máis activas nestas xeiras de limpeza simultánea. O ano pasado incluíronse a praia do Castro-Catía (Ribeira) e máis as de Aguieira e As Gaivotas en Porto do Son. Por entidades, participaron o CEIP Santa Baia (Boiro), o Colexio Bayón de Ribeira e o IES Porto do Son, ás que cómpre engadir (na segunda xornada) o grupo Scout Cham (praia das Gaivotas) e Sachos á Rúa (na praia de Castro-Catía).
A limpeza simultánea de praias que organiza ADEGA está dirixida a todo tipo de públicos, centros de ensino, asociacións e entidades que queiran formar un grupo de voluntarios e voluntarias que acudan á súa praia máis próxima para retirar manualmente os residuos que nela fiquen depositados. No entanto, o venres 18 de outubro, a actividade será desenvolta sobre todo polos centros de ensino, e o sábado 19 polo resto de entidades e persoas participantes.
Para o correcto desenvolvemento da limpeza, ADEGA fará entrega a cada persoa participante dun protocolo de limpeza de praias, no que se explica cales son os pasos a seguir antes, durante e despois da execución dunha limpeza ecolóxica na que non se xeren impactos innecesarios.
O ano 2018 participaron unhas 500 persoas, que conseguiron reunir centros de ensino, entidades ecoloxistas, asociacións culturais, escolas de surf e de mergullo, que contaron ademais coa colaboración de varios concellos. Grazas a esta actuación simultáneas retiráronse das praias galegas máis de 4.000 quilos de residuos, sendo o plástico o tipo de refugallo máis abundante.
Polo de agora, xa se sumaron á VIII Limpeza simultánea de praias de ADEGA 7 centros de ensino, 8 entidades ecoloxistas e deportivas e 8 concellos da costa galega.
Para inscribirnos podemos facelo a través de adega@adega.gal e o teléfono 981570099.
