A oitava Limpeza Simultánea de Praias inclúe areais da nosa comarca

15 Outubro 2019

20191015 Esta fin de semana (días 18 e 19) toca equiparse a proba de temporais e baixar ás praias a recoller lixo. Neste senso, a oitava edición da Limpeza Simultánea de Praias da asociación ecoloxista ADEGA é unha loita contra os brazos cruzados, unha loita que xunta xente de todas as idades, profesións e procedencias baixo unha arela común: sensibilizar á sociedade da importancia do xesto de baixar a area e recoller refugallos. Segundo confirma ADEGA, nas xeiras desta fin de semana xa están adheridas máis de 50 entidades (unhas 40 asociacións e colectivos docentes e unha decena de concellos).

As limpezas realizaranse nun total de 20 areais galegos, dos cales a meirande parte pertencen á Costa da Morte, aínda que tamén se prevén limpezas en praias do Barbanza, por exemplo nas praias sonenses das Gaivotas (Grupo Scout Cham), Caveiro (IES Porto do Son) e Aguieira (ADEGA-Compostela) e nas ribeirenses de Corrubedo (co areal obxecto da recollida de lixo aínda por confirmar). Neste último caso, o labor de limpeza de Corrubedo será desenvolvido polos voluntarios de Kiteboardingalicia).

Segundo informa ADEGA, das preto de 50 entidades participantes, 31 serán centros de ensino de secundaria, institutos e a Oficina de Medio Ambiente da Universidade da Coruña, que realizarán a súa actividade o venres, 18 de outubro en horario de mañá.

O sábado, 19 de outubro, tamén participarán na VIII Limpeza Simultánea de praias convocada por ADEGA unhas 10 entidades de carácter ecoloxista, de deporte ao aire libre, ou ligadas á produción marisqueira.

Desta volta, colaboran os concellos de Nigrán, Fene, Carballo, Carnota, Fisterra, O Grove, Muros e Outes.

A edición do ano pasado

O ano pasado incluíronse, entre outras moitas, a praia do Castro-Catía (Ribeira) e máis as de Aguieira e As Gaivotas en Porto do Son. Por entidades, participaron o CEIP Santa Baia (Boiro), o Colexio Bayón de Ribeira e o IES Porto do Son, ás que cómpre engadir (na segunda xornada) o Grupo Scout Cham (praia das Gaivotas) e Sachos á Rúa (na praia de Castro-Catía).

A limpeza simultánea de praias que organiza ADEGA está dirixida a todo tipo de públicos, centros de ensino, asociacións e entidades que queiran formar un grupo de voluntarios e voluntarias que acudan á súa praia máis próxima para retirar manualmente os residuos que nela fiquen depositados. No entanto, o venres 18 de outubro, a actividade será desenvolta sobre todo polos centros de ensino, e o sábado 19 polo resto de entidades e persoas participantes.

Para o correcto desenvolvemento da limpeza, ADEGA fará entrega a cada persoa participante dun protocolo de limpeza de praias, no que se explica cales son os pasos a seguir antes, durante e despois da execución dunha limpeza ecolóxica na que non se xeren impactos innecesarios.

O ano 2018 participaron unhas 500 persoas, que conseguiron reunir centros de ensino, entidades ecoloxistas, asociacións culturais, escolas de surf e de mergullo, que contaron ademais coa colaboración de varios concellos. Grazas a esta actuación simultáneas retiráronse das praias galegas máis de 4.000 quilos de residuos, sendo o plástico o tipo de refugallo máis abundante.

Para inscribirnos podemos facelo a través de adega@adega.gal e o teléfono 981570099.

Outros artigos

O novo Auditorio de Ribeira abrirá o sábado 1 de xuño

O novo Auditorio Municipal de Ribeira abrirá as súas portas o sábado 1 de xuño e para celebrar a súa apertura, a Concellería de Cultura está a organizar unha programación especial que se estenderá ao longo de todo o mes. Esta coincidirá co "Xuño dá Cultura e as...

+

Publicidade

Revista en papel

Opinión

“Meus irmáns” – Xulio Xiz

“Meus irmáns” – Xulio Xiz

Fóronse meus dous irmáns: Mato, o maior, e Santi, o pequeno. O maior, morreume hai unhas semanas. O máis novo, o día do Pai. Se Xesús tivo vida longa e froitífera, Santi foise moi cedo despois de poñer unha pica en Bristol. Os tres somos tamén agora irmáns en terra:...