20190925 Para to@s @s que seguiron de preto o traballo do poeta rianxeiro Gonzalo Hermo (Taragoña 1987), autor de libros tan notábeis como Crac (Barbantesa 2011) ou A Vida Salvaxe (PEN Clube Galicia, 2018), non será de estrañar o importante recoñecemento que vén de obter Diario dun enterro, a súa nova contribución literaria, desta volta con feitura de novela: o Premio de Narrativa Breve Repsol 2019 (trece edición).
O autor, que amais de poeta é filólogo e profesor, conseguiu a devandita distinción “pola sinxeleza estrutural e o estilo depurado da novela, que afonda nun tema universal como so os rituais da morte e a súa pegada nos roles familiares”. Con este punto de partida, a obra achéganos a un personaxe protagonista que se revela contra a súa orixe e contra a influencia da tradición e os antergos á hora de ir dando forma ao seu destino.
O premio foi dado a coñecer hoxe ao mediodía na Coruña polo secretario xeral de Política Lingüística, Valentín García; o director da refinería de Repsol, Javier Sancho, e a voceira do xurado, a novelista e poeta Berta Dávila. O galardón, que convocan conxuntamente a Xunta de Galicia e a Fundación Repsol, está dotado con 12.000 euros e a publicación da obra por Galaxia.
O xurado salientou tamén “o equilibrio entre o fondo e a forma” do que fai gala Diario dun enterro, amais “da regularidade da construción narrativa, a veracidade dos diálogos e a honestidade da mirada que se deita sobre os personaxes”.
Filólogo, profesor e escritor
Gonzalo Hermo (Taragoña, Rianxo, 1987) é licenciado en Filoloxía galega e doutor en Lingüística. Impartiu docencia na Universidade de Santiago de Compostela e mais na Autónoma de Barcelona. Actualmente, vive en Barcelona, onde traballa como autónomo no sector editorial e é profesor de escrita creativa da Escola de Lletres.
Publicou tres libros de poemas: Crac (Barbantesa, 2011), Celebración (Apiario, 2014), editado en catalán por Godall Edicions e en castelán por La Bella Varsovia, e A vida salvaxe (Pen Club Galicia, 2018). Gañou, entre outros recoñecementos, o Premio da Crítica en 2014, o Premio Nacional de Literatura na modalidade de Poesía Nova Miguel Hernández en 2015 e o Premio de Poesía Afundación 2018. Diario dun enterro é a súa primeira novela.
O xurado desta edición estivo composto por cinco sobranceiras personalidades das letras galegas: Anxos Sumai, gañadora da II edición do Premio Narrativa Breve Repsol pola súa obra Así nacen as baleas; Carlos Lema, director de Edicións da Editorial Galaxia; Euloxio Rodríguez Ruibal, académico da Real Academia Galega; Berta Dávila, gañadora do Premio Narrativa Breve 2013 pola súa obra O derradeiro libro de Emma Olsen, e Dolores Vilavedra Fernández, profesora de literatura galega na USC.
Do mesmo xeito que en anos anteriores, o premio está dotado con 12.000 euros e coa publicación do libro pola Editorial Galaxia. A entrega do galardón celebrarase antes de final de ano, nun acto público na cidade da Coruña. Para máis información cómpre visitar fundacionrepsol.com.
