20190926 A Asociación Cultural Barbantia, La Voz de Galicia, a Editorial Galaxia e o Concello de Noia van organizar este venres 27 de setembro un faladoiro literario na devandita vila, que contará coa presenza dos escritores Antonio Piñeiro (Ribeira) e Manuel Portas (nado en Barcelona pero afincando en Santiago), que están a ter ampla repercusión entre a comunidade lectora galega cun dúas grandes novidades: A través do fume, de Piñeiro, e Por Puntos, de Portas, ambas publicadas por Galaxia. A cita en Noia dará comezo ás 20.30 na Casa da Cultura Antón Avilés de Taramancos. No faladoiro presentarase a saída do suplemento cultural A Voz de Barbantia, número 147.
Amais de Piñeiro e Portas, participarán na xuntanza o escritor limiao (aínda que afincado en Boiro) Antón Riveiro Coello, a vicepresidenta de Barbantia María Xesús Blanco e máis o alcalde de Noia, Santiago Freire Abeijón. Durante o acto tamén está prevista a actuación musical do alumnado do Conservatorio de Noia.
A través do fume é unha das máis innovadoras e orixinas propostas literarias das nosas letras recentes. Nela, Piñeiro relata a historia dunha muller que viaxa ao norte de Europa na procura das súas orixes e dun pasado que ten que reescribir a medida que relembra a súa nenez e este proceso de recuperación mestúrase co seu presente en aeroportos, embarques e estacións de tren.
Pola súa banda, Por Portas é unha divertida, irónica e (porén) moi humana aproximación á realidade da xente anónima (e xeralmente solitaria) que se presenta (en Santiago, pero podería ser calquera sitio) ao curso obrigatorio dos condutores que perden, por moi diversos motivos, os puntos precisos para seguir conducindo.
