20190812. Máis de 50 persoas acordaron na reunión do venres na Casa da Cultura de Castiñeiras iniciar unha serie de mobilizacións contra o proxecto de implantación dunha depuradora de mariscos no porto.
Na xuntanza, as intervencións versaron sobre o rexeitamento e malestar veciñal pola “inxustificada intención de instalar a depuradora”, tal e como apuntou Xurxo Ferrón, voceiro do colectivo de afectados.
Ademais, no encontro manifestouse o malestar polo descoñecemento tanto das características e magnitude deste proxecto coma do estudo de impacto ambiental, así como da repercusión no funcionamento do peirao da parroquia.
Segundo sinalou Ferrón, resulta “incomprensible que no 2019 Portos considere que a vinte metros da praia de Castiñeiras, e xusto ao lado da pequena praia do Cornechiño, que vai ver imposibilitado o seu acceso polo dominio público, é un lugar idóneo para unha depuradora de mexillóns.” Así mesmo, entenden que Portos, “minimizando a gravidade do impacto, está permitindo a destrución das rochas do acantilado do Castro.”
Por todo isto, organizan para o sábado 17 unha concentración, ás 12.00 horas, no porto de Castiñeiras contra “este disparatado e anacrónico proxecto.”