20190823. A segunda edición da Festa da Familia celebrarase o domingo, 1 de setembro, nas inmediacións da ribeirense praia de Coroso, a carón da zona do instituto. A cita deste ano conta cunha ampla programación. Así o deron a coñecer esta mañá a presidenta do colectivo, Puri Cores; a primeira vicepresidenta, Juana Ermitas Crujeiras; e a concelleira de Cultura, María Sampedro.
A edil ribeirense agradeceu este tipo de iniciativas, así como a implicación desta entidade “na vida social de Ribeira, na vida das familias e en tratar de recuperar eses domingos en familia.” Tamén precisou que se trata dun festexo dirixido a todo tipo de fogares, co obxectivo de que todo o mundo se sinta identificado.
Na súa intervención, a presidenta das Amas de Casa, Puri Cores, expresou o seu agradecemento ao Concello ribeirense, concretamente á área de Cultura, e detallou tódalas características deste evento. Deste xeito, inclúe xogos populares, inchables e talleres para os máis pequenos en horario de 12.00 a 14.00 horas e de 16.00 a 18.00 horas; paella gratuíta ata fin de existencias a partir das 14.00 horas; e concerto a cargo de Pan de Leña ás 16.00 horas. Ademais, manifestou que “tratamos de levantar un pouco a familia ese día de ocio, todos xuntos, como se facía antigamente nas romarías.”
Pola súa parte, Juana Ermitas Crujeiras, en calidade de primeira vicepresidenta, insistiu en que esta cita está aberta para todo o público, sen necesidade de ser socio das Amas de Casa. Aproveitou para lembrar que “nós imos facer moita paella, pero a xente que leve comida para estar alí todo o día, sobre todo, para os rapaces que non sempre lles gusta a comida dos maiores.”
O ano pasado este festexo tivo lugar no parque periurbano de San Roque, cunha participación de 200 persoas, polo que se agarda superar esa cifra.
