20190920 O Concello de Rianxo vai recibir unha axuda para seguir rehabilitando as Casas dos Mestres, unha liña de traballo posta en marcha no mandato previo de Adolfo Muíños e que constitúe, en boa medida, un exemplo referencial da relativamente nova estratexia do Concello para recuperar vivendas e espazos cun marcado fin social. O novo proxecto de rehabilitación abrangue a recuperación de catro novas vivendas. Estas serán adicadas a aluguer social ou a dar acollida a persoas vítimas da violencia machista ou en situación de emerxencia. A axuda, achegada polo Instituto Galego de Vivenda e Solo, será de 154.000 euros.
Como dixemos, esta liña de traballo do Concello de Rianxo ten a súa orixe na anterior lexislatura do alcalde Adolfo Muíños e o seu equipo, que queren facer avanzar ao máximo esta estratexia de transformación urbana e a súa confluencia coas políticas solidarias. En palabras do Goberno local, o proxecto de vivenda social en alugueiro que desenvolve o Concello de Rianxo “é un exemplo de goberno a favor das persoas, polas políticas de inclusión e de integración”. As Casas dos Mestres levaban máis de medio século abandonadas e en estado de progresivo deterioro e grazas ao traballo realizado polo Executivo rianxeiro xa contan con 6 inmóbeis recuperados.