20190829 Amais dos varamentos nas nosas costas e a aparición repetida de especies de cetáceos que había décadas que non se vían con tal frecuencia, este verán de 2019 será lembrado como un ano especialmente activo na triste práctica de acosar mamíferos mariños nas nosas rías dende embarcacións de recreo, principalmente, aínda que tamén se ten dado o caso de facelo dende barcos de pesca. Boa parte dos usuarios das redes están estes días a denunciar estes hábitos, incluída a entidade galega referencial no ámbito da defensa dos cetáceos (baleas en xeral, candorcas, golfiños, arroaces, toniñas, etc), a coordinadora CEMMA, que vén de lanzar no seu Facebook imaxes de exemplos do dito acoso e de facer público un código ético no estudo científico dos arroaces (a efectos prácticos, unha escolma de boas prácticas que aplicar no caso de achegarnos a un mamífero mariño).
No código ético lémbrase a conveniencia de parar motores ante a presenza destes animais, á espera de que “sexan eles mesmos os que se aproximen”. Tamén se pon o foco na necesidade de evitar manobras que poidan provocar molestias, e na conveniencia de abandonar o lugar de aproximación en caso de que se detecten sinais de rexeitamento: bufidos bruscos e reiterados, golpes da aleta caudal na superficie ou movementos para afastar os conxéneres da presenza das embarcacións. “Para nós o obxecto principal é que os cetáceos se manteñan tranquilos e non se molesten pola nosa presenza durante o estudo”, explica o CEMMA, advertindo de que se ben a coordinadora non está autorizada a chamar “a atención a ninguén que estea realizando malas prácticas diante dos cetáceos”, si que pode informar á Guardia Civil do Mar da situación.
