20190701 Carlos Lixó, poeta de Carreira (Ribeira), presentou a súa nova obra, As Casas, nunha das principais palestras culturais da nosa terra: o Festigal. A cita foi o 25 de xullo, no marco da sección A Galería das Letras, onde se deu conta das principais novidades editoriais do momento na nosa lingua (un total de 10). O poemario As Casas, editado por Espiral Maior, recibiu o XXX Premio Nacional de Poesía Xosé María Pérez Parallé. Na presentación participaron o propio Carlos Lixó, e máis Marta Dacosta, escritora, quen reflectiu o encontro co público no seu blog, salientando a oportunidade de desfrute literario que significou o reencontro con As Casas: “A presentación fixo que relese e gozase de novo deste poemario breve mais intenso”.
Carlos Lixó fixo un percorrido polos seus hábitos de escritura (“escribo desde o instituto mais en pequenas doses e de maneira irregular, de aí que o que máis teña feito sexan poemas soltos e relatos”) e polas implicacións desta nova obra na súa traxectoria literaria (“con este libro foi diferente, xurdiu todo á xunta, na primavera de 2017”). O autor lembrou que a súa nova entrega de poemas é en certa maneira un reencontro co noso pasado recente, tal e como sinalou noutra presentación previa: “Nel enfróntome á infancia, á paisaxe e á construción das identidades no rural que nos resta despois da fin do mundo campesiño. Escribo sobre deixar unha casa e todas as casas”.
Sobre Carlos Lixó
Carlos Lixó Gómez, nado o 11 de novembro de 1991 en Carreira (Ribeira), obtivo en dúas ocasións o premio de relatos curtos do Concello de Cambre e o terceiro premio de relatos curtos do Concello de Ames. Publicou poemas na revista Dorna e colabora co xornal dixital Sermos Galiza.
No 2017, segundo nos lembra a Galipedia, foi merecedor do Premio Nacional de Poesía Xose María Pérez Parallé polo seu poemario presentado co título Murallas de pedra sen cemento que duran para sempre, e que foi publicado co título As casas, publicado por Espiral Maior. O xurado estivo composto por Chus Nogueira, Jesús Castro Yáñez e María Lado.
No 2018 recibiu o premio a artigos xornalísticos normalizadores do Concello de Carballo con Alpabardas verdes.
