20190830 En pleno remate de agosto non está de máis lembrar que o verán continúa, e que pola banda de Rianxo aínda está pendente de celebrarse a edición 2019 dun dos grandes acontecementos festivos da nosa terra e de máis alá: as Festas da Guadalupe, que se desenvolven entre o 13 e o 20 de setembro. Para ir facendo boca e para ter ben informada á internacionalmente estendida e coñecida comunidade de seareiros da Moreniña, embaixadores do himno galego non oficial (A Rianxeira), a organización das festas (a Asociación Sociocultural A Moreniña co patrocinio do Concello, a Deputación e maila Xunta) está a xerar nas redes unha intensa actividade.
Por exemplo a través da web das festas, http://festasdaguadalupe.gal/, que está a pleno rendemento, cen por cen actualizada, a xeito de axenda revisada dos principais acontecementos da dita semana e, tamén, como un mapa para non perdernos.
A web inclúe, entre outras seccións, un acceso directo ao programa (en formato PDF) das festas rianxeiras e os cartaces das mesmas e de todos aqueles acontecementos que van incluídos no evento e que o complementan: por exemplo o festival Rock in Rian, a Verbena Infantil, o Rianxo on Fire ou a Festa dos 80 que o día 13 de setembro nos leva directos (e con feitura de revisión musical e estética ao estilo da serie Stranger Things) á década en que trunfaban Os Goonies, os peiteados cardados ou os radiocasetes na praia. A páxina compleméntase con apartados sobre a historia da festividade, sobre A Moreniña (as orixes, a procesión), a canción A Rianxeira (se cadra a canción galega máis escoitada da historia, segundo os organizadores) ou O Feirón.
A actividade informativa da Guadalupe enriquécese ademais cos datos permanente actualizados que se van ofrecendo a través do Facebook, o Twitter ou o Instagram.
