20190716. O Concello de Ribeira vén de implantar novas medidas dirixidas a evitar nos meses de verán a inseguridade viaria no entorno portuario de Corrubedo e conceder ao mesmo tempo facilidades de aparcamento nas inmediacións, “no ánimo de atallar situacións que poñan en risco a integridade dos peóns nunha época na que poboación e afluencia de visitantes a este pequeno pobo aumenta de xeito exponencial.”
Así e tal como está notificando in situ a Policía Local, o acceso de vehículos motorizados ao porto da parroquia e rúas da contorna estará limitado só a residentes ata o 1 de setembro, exceptuando labores portuarios, emerxencias e servizos de carga e descarga. Desde o Concello sinalan que se entende por residentes tanto aos veciños empadroados no pobo coma aqueles que posúen alí unha vivenda ou residan temporalmente baixo aluguer, hospedaxe ou fórmulas análogas.
Ademais, indican que aqueles cuxo vehículo ou vehículos non estean censados no Concello ribeirense a efectos do Imposto de Vehículos de Tracción Mecánica deben poñerse en contacto coa Policía Local acudindo ás súas dependencias ou chamando por teléfono ao 981871178 co fin de comunicar número de matrícula, nome do titular do vehículo e enderezo da vivenda de Corrubedo na que se aloxan. Deste xeito, poderán circular libremente pola zona restrinxida durante xullo e agosto sen expoñerse a posibles sancións.
Por outra banda, a parroquia conta cun novo aparcamento gratuíto de 4.000 metros cadrados con entrada e saída desde o tramo inicial da estrada do faro que se suma ao xa existente na rúa Buenos Aires. Está previsto que esta mesma semana rematen os traballos de acondicionamento e sinalización desta nova área de estacionamento, situada a apenas 4 minutos a pé do centro portuario e con capacidade para uns 150 vehículos.
