20190718 O prestixioso arquitecto británico afincando en Ribeira (Corrubedo), David Chipperfield, vén de acadar un novo fito na súa carreira, unha traxectoria ateigada de éxitos internacionais. Trátase da inauguración oficial (este mes de xullo en Berlín) do museo James-Simon-Galerie, a porta de acceso á Illa dos Museos da capital xermana. Trátase dunha espectacular construción que culmina unha vizosa confluencia, a de Chipperfield e Berlín, que deita un ronsel de grandes fitos arquitectónicos e urbanísticos, como por exemplo a adaptación aos novos tempos do Neues Museum, bombardeado durante a Segunda Guerra Mundial.
Volvendo á James-Simon-Galerie, é un proxecto longamente madurado dende o estudo de Chipperfield na cidade, unha das obras de meirande significado e implicación da súa traxectoria: unha galería simbólica en todo o termo da expresión, xa que ademais de culminar a devandita relación con Berlín, dá acceso á Illa dos Museos e, tamén, a un novo xeito de entendermos a arquitectura: “Convídanos a lela dunha maneira que transcenda a súa función práctica”, sinalou Chipperfield nunha entrevista.
A obra, que abeira o río Spree e máis o devandito Neues Museum, conecta este inmóbel co Museo de Pérgamo, achegando unha arquitectura limpa e contemporánea que sintetiza o clásico para poñelo á vangarda do moderno. Este xogo de formas e símbolos reforza o seu carácter de ponte, entre o pasado e o presente, entre pobos, entre culturas, entre linguas, entre irmáns.
